تعب خلكي بكثر ما حاط بي حسبات
اكابر والبروحي المستحه مغطيه

وين توجر الما ضال بيهه جناح
ياحلك اليكضهه يريدهه تسليه

كشخ بيه عله غفله الشيب وانه زغير
وراواني زماني المحد مراويه

اتيه واقعي واشرد ادور احلام
ويجيبه الليل غلفه وصفنتي ادليه

واكلج ها يروحي شفتي تالي الطيب
ثمرة مستحاج وطيبتج شفتيه

ياروحي الربع موكلهم يوفون 
ولا كلمن نعشكه نصير قيس عليه

الدنيا بغير راحت بال ماتراد
وانه ليلي سوالف ع المخده اكضيه

اكولن زين للينشدني بس يازين
وضحك والحجي اليوجعني ما حاجيه

راكب فوك هزله ووي زماني طراد
وشل كاس صبري وغيضي راح اجفيه

والم شراعهن واجتف ضنوني جتاف
وادثرهن واضمهن واليموت ارثيه

جزه ريع الانطره وبين المحصول
بانت والبوجهي يبين الخافيه

شبقه وانه العمر وشلته بالصفحات
شيسولف اليفحط والوكت جازيه

هوه الماله حظ بالدنيا يتعب ليش
اليركص وره المامش بالتوالي يتيه

خل يثكل مطرهه مبلل من العام
ماضل كتر يابس بيه حتى احميه

كمت امطر واغيم والفلح شمات
الغيم شمابجه الفلا يفرح بيه

الينغث خاطره ويحجي لعزيزه يهون
مكدر خاطر ويم ياعزيز احجيه

مرات اختنك وطيح مني دموع
بس والله دمعي لغيري ما راويه

الوادم موكبل تتسله بالينصاب
واليعثر انياب صويحبه اتانيه

بيه العيب يمكن ماعرفت اختار
خل نفرض غشيم وغشني الماشيه

بس الكاتلتني من الشرب وياي
من نفس الحليب ومامغزر بيه

الشاعر محمود العبادي