قصيدة.......اخذني وياك 2017
الشاعر رحيم النصرالله .....
اخذني وياك لا تزغر مكاتيبك
لا حوبة عطش للماي تنشف والنده ايجيبك
ولاجف اليذكرك من تهد جفي
جبيره الدنيه خاف تضيع يا ولفي
خاف عيونك تخونك
اخاف الناس ينسونك
اخاف تموت من تعطش ولا عود اليخضر طوله بظنونك
وين اتحصل ابنادم يمد روحه اعلى كد روحك
وين ايصح كلب مثلي يلف طوله على اجروحك
يخايب دنيتك عازه
الماعنده صدك بالناس تيميل بجتفه الجنازه
تعال عيوني عطشانه
تعال الدنيه خلصانه
تعال حرورت عيونك خذت مني مواعيدك
يلتدري الكلب يهواك حيل وخاطري ايريدك
يلمعطل مكاتيبي .. ولا مرسال يرويني
ولادمعة صدك تنشاف حتى احجيلك ابعيني
برد كلشي وبعدهي كلوبنه تشوفك
تعب بيه العطش عمرين
ياشاطي العشك مبخوت كل عطشان يتبده على جروفك
واطيح بخاطرك ليله
واجيس عيونك من ابعيد
واتلكاك .. واشبكك لو صرت چيله
يعايفني اعلى حبل اصباي يمته اتهز مراجيحك
اخاف الشيب يفضحني واخاف اعيونه اتصيحك
يمته تطيح بجفوفي واكول عيوني ضاكنك
يمته تسامر عيوني وارد بشوفي انشدنك
يشايل كل عناكيدي
يمثمر من هذاك اليوم من طكن مواعيدي
من كتلك احبك من صدك والسان
من كتلك نهاري يموت بس لون الشمس نيشان
من كتلك تبدت جلمتي بشفتك
من كتلك اخذ روحي ..
خذتني الناس .. خاف نروح من بختك
يحظ الما حضه بروحه بحر واشراع
يحظ الما اخذ خله اعلى ذمته امتاع
اخذني بلون روحك يلخذيت اللون
اخذني الغيمه من اتطيح تلكه الكاع كلها عيون
البخت عثرة عشك وتموت
البكلبه تموت الناس بعيونه يموت الصوت
يذاك انت
اشكثر عايف طمع بعيون الولايه
يشايل كل حسن نثيه اخذها الريح من شاف العشك رايه
يذاك انت
جزيت اعزاز البكلبي وضكت طعمك
كبرت بعيني احجايه
وطفح بالروح شوكك يلصعب ضمك
حلات امرورتك تنضاك
وحلاتك يازعل مرضاك مايشبه زعل عشاك
يا اخر شتل بالروح تذبل لو كلت مشتاك
اخاف اعليك
اخاف تروح من عيني
وادريبك نخل ينهاب
اشما مر الخضار تضيع .. ما تنباك
التعليقات