بقلم الشاعر خالد الغالبي

گضت يا صاحبي وصارت سوالف ليل
عقدة ياهو انت البارحه انحلت
عرفتك والدروس ٲستوعبتهن زين
واحلامي جماعه اويالندم صلت
ما اگلك نسيت وكلشي راح اوياك 
راح اوياك كلشي وطعنتك ظلت
تلچمني واكابر گ" وه يم الناس
واسترها ابضحكتي الآه لو مرت
رغم مابيه حسره ابگد عظم فرگاك
وابگد ما ابگلبي اشواگك احتلت
اسف عالمشاعر طشرتها اوياك
وابمرواح غدرك بالهوه اذرت
واسف على احلامي الفصلتها افصال
چي طلعت چبيره اعليك ماكفت
دليني ابدرب مابيه اثر جدمك
ودليني ابهوه اتنفسه وما اشمك 
ياهو انت وتعتني ابذكرياتك عت
غير انت السبب باكبر جرح بالروح
اشبيها الروح كل ما تنذكر رفت
وليش اشتعل كلي اگبالي لو ذكروك
چا غير المشاعر بالگلب بردت
چا هلبت فزعلي ابهجرك النسيان
وهلبت گمت اشوفك مثل ياهو الچان
هلبت مثل غيرك لهفتك قلت
يالخليتني ابين الحياه والموت
حال ام الولد من دفنته وردت
همزين الگلب بالصدر ماينشاف
وانواع الجروح ابداخله انظمت
وهمزين الشماته ابغيري مشغولين
لا عين الي شافت لا اذن سمعت