المايندل مكانه وتايه بلياي 
عتگ بچفوف غيري وبعد مارجعه

حطب چان وشعلته وطلعتله لسان 
وحطب چملته گت خليصعد بسرعه

حايط صير گتله أتوچدك العميان  
باب أنگلب ظل ياهو اليجي ايدفعه 

 المنجل من تعلگه يشوف روحه هلال 
وذا شاف السنابل يرجع الطبعه 

الحلم ماعده بيت براس غيره يعيش
احترمته وطب حلم بس أنگلب وجعه

گلوب الناس هندس واحنه عكس الناس 
    فوانيس وذنبنه گلوبنه مفرعه

العليه عيني انعمت جايبلي صوغه شموع 
گتله بيت الاعمى شتنفع الشمعه 

سهم سويته غصنك بس تردله تموت 
موتك ينجرع ملگاك ماجرعه 

واذكرك كل خميس ومو لأني أشتاگ 
الميت ينذكر بس ليلة الجمعه 

صح عضيتلي اصبع من غبتلك يوم 
صفنتلها وبست وجه وگفه التسعه 

شايل خلگ بلبل عالطرب مفطوم 
بسجن بستان حطه يغني ماينعه 

شامت ما اصير بفاتحة شمات 
وصدگ ما اضحك وماچذب بدمعه 

وما اطعن نهر بالمردي أگولن عيب 
لذلك بلمي ظل ومالحگ ربعه 

بيرك مو بشر چاليش عده السان 
سر مو نبي ببيرك ذاب ويطلعه 

موشرط الشريفه الماتكض الباب 
مامنعن زليخه ابوابها السبعه

المرايا عزيزه ببيت الحديثات 
وگلبي مرايتك بس كثرت صدعه

موت گبالي گتلك لابعيني اتموت 
وي ماي السدر ليك اخبط الدمعه

 هذيچ الكعبه مو يم بابي جاي اتوب 
ما اغفر ذنوبك لو نبي اتفزعه 

.