سبع شبگات"  للشاعر " كرار الركابي

 

تعال وغرد بروحي

وانطي بشاره للضحكات خل تلتم

وخل عودي اليبس بجفاك

يورك ...وانه اريد احلم

يطاري الياس مر بيه

تراها الروح اذا مو خظره ماتسلم

شمس روحي لمع ترجيه تلبسها

وليل الروح ..زلفك لو غفه بخدها

يبال الغيم فدوه اختار كيعاني

محتاج لعذوبة ماي مالامسها جف واحد

تراها الروح ضميانه..هاك الروح ونشدها

هاك الروح ونشدها..وي روحك حتى ماتنفل

وي روحك حتى ماتذبل

يبال الغيم اغار من الهوه الجابك

شعنده مكاود زلوفك

خل زلوفك يهدها

وصلت لديرة احبابك

تعال وصير جدامي

تعال وفسر احلامي

ليش احلم سبع شبكات خضره

انوكلن بسبعه صفر من آه

وليش احلم بجفك سيف

كايد عشكي للمذبح

وليش احلم تذبني بنار

ماتحركني اصيح اشاه

وتيه بصحرة ضنوني

تره احلامي الكصيره وياك حيل تدولب عيوني

وليش من ارد اشوفك عود الا يغمضن جفوني

مرات الحلم جذبه

ومرات العشك لعبه

اذا تكدر تضحك هواك ليش الضحكته تسلبه

شما علك ضحك بالروح كله يطيح

 تبقى الآه المجلبه