مجبور ابتسم لو بيه ميه اه
ماريد الحياة بحسرتي اكضيها
وأنه عاشك غشيم وعانديت الريح
حته اركب الصعبه وستلذ بيها
مرات القدر بالقسمه يلعب دور
ويغير علاقه العشك باديها
قصتنه ابتدت بمشابك النظرات
بشارع والصدف رسمت معانيها
بالملكه السكوت اعضم بلاغه يصير
من تحجي العيون وتفضح البيها
من تخجل الورده والخدود اذوب
ويغار الشعر يركض يغطيها
ثواني وعوضن بالروح ميه عام
وسنيني المظن كل طعم مابيها
ماعشك كبل وعرفت طعم الشوك
من دكات كلبي ولهفته اعليها
ورافكت الدرب والباب كله اعيون
واكف وانتظر لمعت تراجيها
تواعدنه وكضينه ايام جنهن طيف
وجلمات الغرام انجاب طاريها
وحلمت بقصر فوك النجوم يصير
وقررت الاميره اهناك اسميها
وعلى غفله الوكت غير نوايه الروح
وانهدمت احلامي الجنت بانيها
وبحجة القسمة وبن عم وعراف
ضاعت مني ورده القدر هاديها
حاولت اشكثر اعدل نوايه الريح
وحرفه السفينه لحضن شاطيها
بس موج البحر وداها عني ابعيد
اخذه وماكدر بصماتي يمحيها
وبدت رحلة ضياعي والليالي اشهود
جم ردن بردن بدموعي ساكيها
وعاشرت السهر والليل والصفنات
اسولف والجروح اتريد راعيها
خايف على احلامي الحلوه لاتنباك
وصلت انه لصلات الخوف اصليها
من عدها وعشت ميت بلاي إعزاز
وحسيت النفس لريه يجويها
لأن ذنب العشك والشوك والعشاك
ذمة بركبة الأعراف اخليها
ومليت النظر وكرهت طعم الشوف
من عاينت غيري ايكود بيديها .
جفاني وخله بيه اسهام ماتان
حبيبي وكتله تان ارجوك ماتان
ومحمد يوم شفت العرس ماتان
اجدامي ومات مية قيس بيه
التعليقات