بقلم الشاعر منصور المشرفاوي        

نشدوني عن ربعي وفرشتلهم گاع
ضليت اعدهن لحد ما صارن تل

كل زينه منهم تنذكر تسوه ذراع
طيبة گلبهم من اعدها الاول

هنيالي كلما گولها بروحي تعيش
شاهد حچينه الكلفه  ربعه معدل

ما عاشرتهم عن طمع لا عن شي
بس منبع الخوه ابفعلهم رتل

نية گلبهم صافيه وچنهه الماي
صارت مثل واليمها مر يتبلل

صحباني فزعتهم ضوه بنص اليل
چنهم گمر و14 من يكمل

بعيوني احطهم والگه روحي بكل عين
من الله النضيف اگليبه يبقه مدلل

عايش نفس برواحهم حته بطيف
لو ضاگ خلگي بساع تگضي وتسهل

آخ من اکول اسم الله توصلني بساع
وطيب روحي وينحل الما ينحل

چاهيه غير الصحبه لمة خوان
من تنعگد بحچايه ابد ما تنفل

مو جيبي ربعي بربعي جيبي شماريد
وين الثگيل الما رضه اعله الينذل

صحبتنه خوه وعلبخت  ما تنعاف
ما تخرب شما تبقه ما تتبدل

وادمنه تكره لو سوه تشوف ثنين
عاشو عمر ما مره واحد يزعل

لو صاحبك مو خوش انت التنعاب
چا هوا ياهو الجابه ومنين اندل

الصاحب الزين امك اسولف بي
وي زادها المالح تفگده وتسأل

لحد يذم ربعه ويگول انه فلان
الزين زين بربعه من يتعدل

الوادم بگاع الله تشتل وتخيب
وانه اشتل بروحي الزلم ما تذبل

حته الخرب وياي ما ذمن بي
اذكرله موقف زين يعله وما قل

غلطان كلمن گال مامش صحبان
چا هيه دنيه بغير صاحب تقبل

سالفتي حلوه وچنها ربعي البضيج
شما طولت لا تخرب ولا تنمل